Македонскиот пејач Мартинијан Кириловски успешно ја претстави Македонија на едно од најзначајните регионални музички случувања – фестивалот „Бисер Јадрана 2026“, кој се одржа на 18 јули во Тиват, Црна Гора. Со сигурен сценски настап и моќна интерпретација, Кириловски остави силен впечаток кај публиката, колегите и музичките професионалци, потврдувајќи дека чекор по чекор го гради своето име и надвор од македонските граници.
На фестивалската вечер настапија 25 композиции, а песната „Сирена“, со која Кириловски ја претстави Македонија, го освои високото 9. место.
Но, самиот избор на композицијата за учество претставува значаен успех, имајќи предвид дека беше избрана меѓу повеќе од 170 пријавени песни од автори и изведувачи од целиот регион.
Најголемото признание, сепак, не дојде од бодовите. Спојот на оригиналната композиција „Сирена“ и моќната интерпретација на Мартинијан Кириловски резултираше со една од највпечатливите изведби на годинашното издание на „Бисер Јадрана“, која беше одлично прифатена од публиката, колегите и музичките професионалци.
Инспирирана од старогрчкиот мит за сирените, композицијата ја пренесува вечната борба меѓу искушението и разумот. Низ современ музички израз и впечатлива мелодија, „Сирена“ го доловува магичниот повик на сирените и внатрешната борба да му се одолее на она што најсилно нè привлекува. Токму таа музичка приказна, надополнета со силната интерпретација на Мартинијан Кириловски, ја вброи „Сирена“ меѓу најоригиналните композиции на годинашниот фестивал. Публиката ја напушти фестивалската вечер носејќи ја со себе мелодијата, емоцијата и интерпретацијата на Мартинијан Кириловски – изведба што продолжува да живее и долго по последниот аплауз.
Зад „Сирена“ стои проверен авторски тим. Автор на музиката и текстот е Митко Чешларов, а аранжманот го потпишува Ангел Ќосев, со што повторно ги здружија силите по успехот на песната „Sećanje na april“. Композицијата е снимена во студиото „Подрумот“.
Со својата интерпретација на „Сирена“, Мартинијан Кириловски уште еднаш покажа дека заслужено го гради своето место на регионалната музичка сцена. Одличниот прием кај публиката, колегите и музичките професионалци е најдобра потврда дека неговиот пат надвор од македонските граници продолжува во вистинската насока. Ако се суди според реакциите во Тиват, „Сирена“ е песна што има сè што е потребно да стане регионален хит и да живее долго по завршувањето на фестивалот.
фото:You tube printscreen/ Bojan Delić – NVO Delić koji nedostaje and Martinijan Kirilovski
