Националниот ансамбл за народни игри и песни „Танец’’ организира едукативни часови за млади од 18 до 23 години.
Пријавување: 29.10.2024 – 7.11.2024
Селекција на кандидатите: 8.11.2024, 10 часот
Повик за пријавување за бесплатни едукативни часови за изведба на народни игри и песни, под менторство на врвни уметници од ансамблот Танец, наменети за младинци на возраст од 18 до 23 години.
Националниот ансамбл за народни игри и песни „Танец’’, ги повикува сите заинтересирани младинци на возраст од 18 до 23 години, коишто учат или имаат завршено средно музичко/балетско училиште на насоката за традиционална музика и игра или се на академски студии во чиишто програми се изучува музичко-сценскиот фолклор, како и сите млади ентузијасти коишто се здобиле со солидни знаења од областа, преку членување во културно-уметничките друштва, да се пријават на овој повик и да ги покажат своите потенцијали. Најдобрите од нив, избрани од стручната комисија, ќе ја имаат можноста да посетуваат специјални едукативни часови во ансамблот „Танец’“ и ќе можат да учат од најдобрите во музичко-сценската дејност во Македонија и пошироко.
Кандидатите, покрај општите услови за возраста и основното предзнаење, треба да се во добра општа здравствена состојба за следење на часовите.
Kои од пријавените ќе го освојат правото на посета на едукативните часови ќе зависи од одлуката на стручната комисија, којашто ќе спроведе проверка на знаењата и умеењата на секој пријавен кандидат, а таа ќе се состои од:
• Проверка на основните музички предиспозиции на кандидатите (слух и ритам)
• Констатирање на физичките предиспозиции и сценичноста на кандидатите, согласно стандардите на НУ Танец
• Посебна проверка на способностите на кандидатите, соодветна за категоријата во која се пријавилe:
– играчите треба да изведат еден играчки образец по личен избор и еден од репертоарот на „Танец“, предложен од комисијата;
– вокалните исполнители треба да изведат една народна песна по личен избор и една од репертоарот на „Танец“, предложена од комисијата.
Сите кандидати, на приемниот ден, треба со себе да понесат патики за вежбање во сала или опинци, заради непречено презентирање на своите изведувачки способности.
Сите примени кандидати, коишто ја поминале претселекцијата и целосно ги завршиле едукативните часови, ќе се здобијат со сертификати за успешно помината обука за ансамблов изведувач на народни игри, односно песни на Националниот ансамбл за народни игри и песни ТАНЕЦ.
Начин и рок за пријавување:
Кандидатите е потребно да испратат електронска пошта (e-mail) на следната адреса: [email protected] , во која ќе го наведат своето име и презиме, датумот на раѓање, бројот на личната карта (што ќе ја покажат на увид на стручната комисија) и видот на часови кои сакаат да ги посетуваат (часови за играч или часови за пејач).
Рокот за пријавување е од 29.10.2024 до 7.11.2024, а проверката на музичко-сценските способности на пријавените кандидати ќе се одржи на 8.11.2024 година, во 10 часот, во просториите на Н.У „Танец’’ на адреса: „Венјамин Мачуковски“ бр. 7, 1000 Скопје.
Националниот ансамбл за народни игри и песни „Танец“, покрај својата матична дејност, секогаш води сметка и за правилниот развој на новите генерации и оттука посебно внимание ѝ посветува на својата благородна мисија за зачувување на македонското културно наследство и преку откривањето и негувањето на талентите од помладите генерации. Преку организирање на семинари, мастер-класови и давање на континуирана професионална поддршка на повеќе нивоа, НУ Танец свесно и одговорно го поддржува фолклорниот аматеризам, училишното и академското образование од сферата на фолклорот, како и идните професионални изведувачи, обезбедувајќи континуитет на културните традиции и создавајќи платформа за раст, креативност и уметничка извонредност во изведбата на музичко-сценскиот фолклор. Овој менторски пристап, не само што го поттикнува развојот на вештините, туку го засилува и чувството за културен идентитет кај младите.
