Многу возачи не сакаат да ги менуваат зимските гуми во текот на летото или едноставно забораваат да го сторат тоа.
Сепак, ова не е добра идеја, бидејќи зимските гуми не се направени за високи температури. Тие се помеки од летните гуми, се трошат побрзо и што е најважно, можат сериозно да ја загрозат безбедноста.
Германскиот автомобилски клуб ADAC предупредува дека зимските гуми во текот на летото може да го зголемат ризикот од сообраќајни несреќи, особено поради загреаниот асфалт и прегревање на гумите.
Во пролетните месеци тоа можеби се уште е возможно, но во летни услови, кога температурите се високи, зимските гуми имаат послабо држење и подолги растојанија на сопирање, пишува магазинот ХАК.
ADAC тестираше зимски и летни гуми на асфалтни температури од 30 до 36 степени. Резултатот беше загрижувачки: возилото со летни гуми целосно запре по 36,3 метри со брзина од 100 km/h, додека автомобилот со зимски гуми продолжи да се движи со 37 km/h и застана дури по 41,9 метри.
Зимските гуми може да се прегреат, особено ако возите брзо или ако возилото е силно натоварено (на пример, за време на одмор). Ова резултира со недоволно држење, што директно влијае на стабилноста и безбедноста.
Затоа експертите советуваат да не се користат зимски гуми во лето, дури и ако тие се уште имаат добра длабочина на шарите. Да заштедите пари за замена на гуми не вреди ако ја ризикувате сопствената безбедност и безбедноста на другите.
извор:курир.мк
фото:Freepik
