На фронтменот на познатиот норвешки бенд А-ha, Мортен Харкет, му е дијагностицирана Паркинсонова болест, објави BBC во четврток.
Веста беше објавена на официјалната веб-страница на синт-поп бендот, во статија напишана од нивниот биограф Јан Омдал. Во неа се открива дека 65-годишниот пејач веќе имал две операции на мозокот.
Харкет изјавил дека „не му било проблем да ја прифати дијагнозата“. „Со текот на времето, го прифатив ставот на мојот 94-годишен татко дека телото постепено се предава: „Јас користам што и да функционира““.
А-ha се најпознати по нивниот познат хит „Take On Me“, со препознатливиот фалсет на Харкет, од нивниот деби албум од 1985 година „Hunting High and Low“.
Омдал, автор на биографијата на бендот „The Swing of Things“, напиша дека Харкет претходно бил познат како „култен фронтмен“, „божествено надарен пејач“, „ексцентричен мислител“ и татко на пет деца, но дека последните години тој е и човек кој се бори со своето тело, објавува BBC.
„Не е вест што некој сака да ја објави на светот, но еве ја: Мортен има Паркинсонова болест“, објави Харкет.
Норвешкиот музичар рекол дека „прави сè што може за да спречи влошување“ на целото негово тело, што е тешка задача „да се постигне рамнотежа меѓу земањето лекови и справувањето со нивните несакани ефекти“.
Паркинсоновата болест е прогресивно нарушување на централниот нервен систем, именувано по англискиот лекар Џејмс Паркинсон, кој ги опишал нејзините симптоми во труд од 1817 година.
Болеста доведува до намалување на количество на допамин во мозокот, што е од суштинско значење за регулирање на движењето на телото. Затоа, симптомите вклучуваат тремор, бавно движење, вкочанети мускули, депресија и анксиозност.
Пејачот на култните Black Sabbath, Ози Озборн, актерот Мајкл Џи Фокс и шампионот во боксот, Мухамед Али, исто така страдаат од оваа болест.
Омдал нагласува дека третманот и операцијата на мозок во клиниката „Mayo“ во САД ги ублажиле симптомите на пејачот. Тој сè уште може да вози автомобил, но се сомнева дека ќе може да ја продолжи својата пејачка кариера, пишува BBC.
„Проблемите со гласот се една од многуте причини зошто мојата креативна иднина е неизвесна“, рекол.
Засега нема желба да пее.
View this post on Instagram
„Не очекувам да можам да постигнам целосна техничка контрола врз мојот глас и прашањето е дали сè уште можам да се изразам со него“. „Како што стојат работите сега, тоа не е реално. Но, не знам дали некогаш ќе можам да го направам тоа“, рекол пејачот.
Биографот на бендот опиша дека во добрите денови Харкет не покажува „речиси никави знаци на најпознатите физички симптоми на Паркинсонова болест“, но дека за тоа сè уште е потребен „целодневен напор“ за да се балансираат лековите, третманите со електроди во мозокот, спиењето, нивото на шеќер во крвта и неговиот начин на размислување.
„Тоа не е секогаш успешно и повеќе наликува на непрекинато возење со ролеркостер“, пишува Омдал.
фото:Instagram printscreen/officialaha
