Легендарната босанскохерцеговска пејачка Ханка Палдум со трогателна порака на социјалните мрежи се прости од хрватската музичка легенда Мишо Ковач, кој почина на 31 октомври.
Во емотивната објава, Ханка се присети на заедничките моменти, долгите турнеи и искреното пријателство што ги поврзувало низ годините.
„Нашата музичка сцена остана без уште една легенда. Нè напушти нашиот Мишо Ковач“, напиша пејачката на почетокот на својата објава.
Таа истакна дека неговите песни засекогаш ќе ги чуваат спомените на деновите исполнети со пријателство, почит и братска блискост, кои заедно ги граделе за време на бројните турнеи.
Осврнувајќи се на неговиот животен пат, Палдум нагласи дека, и покрај многубројните животни предизвици, Мишо секогаш останал верен на себе, на музиката и на луѓето што ги сакал.
„Секогаш остана истиот. Оној Мишо кој го сакаше својот Шибеник, својата Далмација, својот Загреб… Сакаше и беше сакан!“, порача Ханка.
Своето последно збогум таа го заврши со особено трогателни зборови:
„Легендо наша, почивај во Божји мир, под маслинова гранка, во мирисот на розите и црцорењето на рајските птици. Од срце, Ханка.“
Мишо Ковач е роден во 1941 година во Шибеник, а во текот на својата повеќедецениска кариера стана едно од најголемите имиња на регионалната музичка сцена.
Неговите песни одбележаа генерации, а неговото заминување остави голема празнина во срцата на публиката и колегите кои со децении ја следеа и почитуваа неговата музика.
