39-тото издание на „Фолк Фест Валандово“ ќе се одржи на 26 и 27 мај 2026 година, најавувајќи значајни промени и освежен концепт кој ветува нова енергија на сцената.
Фестивалот оваа година влегува во ново поглавје со ново раководство, кое веќе најавува поинаков и посовремен пристап во организацијата. На позицијата уметнички директор е Илчо Јованов, додека извршен директор е Горјан Стојановски – тим кој има амбиција да внесе свежина и повисоко продукциско ниво.
Особено внимание привлекува концептот на предфестивалската вечер (26 мај), која ќе се одржи на градскиот плоштад во Валандово и ќе биде поделена на два дела. Во првиот дел публиката ќе ужива во колаж од најпознатите фестивалски хитови, изведени од повеќе познати имиња од македонската сцена, збогатени со нивни авторски песни. Вториот дел е резервиран за мини концерт на еден од најпопуларните македонски фолк пејачи – артист кој веќе докажал дека знае да наполни концертни сали ширум земјата.
Главната фестивалска вечер (27 мај) ќе започне со црвен тепих, носејќи доза на гламур и престиж каков што доликува на манифестација со ваква традиција. Според најавите, на настанот ќе присуствуваат гости од дипломатскиот кор, како и министерот за култура и туризам Зоран Љутков.
Фестивалот и понатаму ќе го задржи својот натпреварувачки карактер, со доделување парични награди, но организаторите најавуваат и можни новитети кои ќе го освежат форматот. Повеќе детали околу програмата и учесниците се очекуваат на официјалната прес-конференција по првомајските празници.
Со вакви најави, „Фолк Фест Валандово“ очигледно се подготвува да ја зацврсти својата позиција како еден од најзначајните музички фестивали во земјава – овојпат со нов дух, но со почит кон традицијата.
