Една од најавтентичните македонски музички групи – „Баклава“, ќе одржи специјален концерт на 23 јуни (понеделник), со почеток во 20:30 часот, во Куршумли ан, во рамки на програмата на фестивалот „Скопско лето“.
Концертот е посветен на одбележувањето дваесет години постоење и творештво на овој состав, кој со својата акустична и етно инспирирана музика остави длабока трага на домашната сцена. Публиката ќе има ретка можност да ужива во песни од сите пет албуми на групата – „Баклава“, „Калемар“, „Ме манкас мучо“, „IV“ и „За Скопје со љубов“ – низ едно емотивно и стилски богато музичко патување.
„Баклава“ е препознатлива по својата уникатна спојка на традиција и урбана чувствителност, а концертот во Куршумли ан ветува вечер исполнета со виртуозни изведби, искрен израз и длабоки емоции.
Влезниците ќе се продаваат на влезот од Куршумли ан, непосредно пред почетокот на концертот, по цена од 500 денари.
