На годинешниот 41. „Макфест“ имаше многу изведувачи, но меѓу нив се најдоа и четворица момци кои уште со првото појавување успеаја да го свртат вниманието кон себе. Со необично име, свежа музичка енергија и сценски настап каков што не се гледа секој ден, Арте-Факт испратија јасна порака – на домашната музичка сцена пристигнува нов бенд кој има амбиција да остави свој печат!
Нивното фестивалско деби беше со авторската песна „Вистина“, со која не само што се претставија пред македонската публика, туку успеаја да се пласираат и во ревијалната вечер на фестивалот. Доволно за нивното име да почне да се споменува и надвор од фестивалската сцена.
Зад името Арте-Факт стојат четворица музичари – Марко Илиевски (вокал), Горјан Стевковски (тапани), Марко Илиевски (гитара) и Леонид Фотиновски (бас-гитара), кои очигледно не планираат да бидат уште еден бенд што ќе се појави, ќе сними песна и ќе исчезне од музичката мапа.
Напротив! Само неколку дена по настапот на „Макфест“, момците направија уште еден чекор напред, организирајќи ја промоцијата на својот прв официјален видеоспот во скопскиот „Public Room“. На настанот, на кој беше поканета и екипата на музичкиот портал „Музика24“, се собраа пријатели, соработници, новинари и љубители на домашната музика. А атмосферата? Токму како нивната музика – опуштена, искрена, позитивна и исполнета со ентузијазам.
Но, што всушност се крие зад името Арте-Факт? Никако случаен избор! Тоа е спој на „Арте“, како симбол на уметноста, и „Факт“, како симбол на вистината и автентичноста. Со други зборови, момците сакаат да бидат свои, да не глумат нешто што не се и да создаваат музика зад која навистина ќе стојат.
А токму таква е и нивната прва песна „Вистина“. Не станува збор за уште една вообичаена љубовна приказна, туку за музичка исповед во која се отвораат теми за искреноста, сопствените слабости, осаменоста, саморефлексијата и надежта. Фронтменот Марко Илиевски, кој го потпишува текстот, преку стиховите порачува дека најтешката, но и најважната вистина е онаа што човек треба да си ја признае самиот на себе.
И музички, Арте-Факт не сакаат да влезат во некаква фиока. Рок, фанк, блуз и џез се само дел од влијанијата што се препознаваат во нивниот звук, а нивната формула ја опишуваат како „стара школа – нов аспект“. Очигледно, не сакаат да ја следат секоја актуелна музичка мода, туку да создаваат песни што ќе имаат сопствен идентитет и препознатлив печат.
Голем удел во финалниот звук на „Вистина“ има и продуцентот Давор Јордановски, за кого членовите на бендот имаат само пофални зборови. Неговото искуство, трпение и подготвеност да ги слушне и надгради нивните идеи биле особено важни за песната да ја добие конечната форма.
Ништо помалку внимание привлекува и видеоспотот, зад кој режисерски застанува Александар Ристовски – Принц. Визуелната приказна е снимена на две добро познати скопски локации – студентскиот дом „Гоце Делчев“ и мостот „Гоце Делчев“. Додека првата локација симболично ја отсликува потрагата по вистината, втората претставува премин кон надежта и личното издигнување. Модерната продукција, надополнета со ретро визуелни детали, ѝ дава дополнителна тежина на приказната што ја раскажува песната.
Ако мислите дека оваа четворка се собрала случајно за потребите на „Макфест“, тогаш сте во заблуда! Нивното пријателство и музичко познанство датираат уште од детските денови, кога заедно учеле музика во училиштето „Илија Николовски – Луј“. Подоцна ја продолжиле приказната со бендот „Допамин“, со кој настапуваат како кавер-состав, додека Арте-Факт е нивната авторска музичка приказна – проектот преку кој сакаат да кажат нешто свое.
Иако се на самиот почеток кога станува збор за авторскиот проект, амбициите очигледно не им недостасуваат. Нивната цел е да создаваат современа македонска музика, да ги негуваат домашните вредности и преку песните да шират позитивна енергија, надеж и љубов кон музиката.
Дали Арте-Факт ќе бидат следното интересно име на македонската музичка сцена, времето допрва ќе покаже. Но едно е сигурно – со „Вистина“ успеаја да го направат првиот чекор, да се претстават пред пошироката публика и да најават дека имаат што да понудат. А кога зад музиката стојат долгогодишно пријателство, заедничко растење и желба за авторско творештво, тогаш приказната има добра основа да продолжи.
Арте-Факт можеби се нови на авторската сцена, но очигледно не дошле само да бидат статисти на неа… И тоа е чиста „Вистина“!
Фото: Иле Ѓоргиевски
