Познатиот боливудски актер Саиф Али Кан бил примен во болница откако бил нападнат во четвртокот рано наутро во неговиот дом во луксузна населба во Мумбај, објавија локалните медиуми.
Според градската полиција, натрапник упаднал во куќата по полноќ, што довело до тепачка во која актерот бил избоден повеќепати.
Со шест убодни рани Кан бил итно пренесен во болницата Лилавати, каде што бил опериран. Нирај Утамани, главниот оперативен директор на болницата, рече дека актерот се здобил со шест убодни рани, од кои две се сериозни, вклучително и една во близина на ‘рбетот.
За неговата состојба моментално се грижи специјализиран лекарски тим. Полицијата покренала истрага и утврдила дека се работи за „обид за кражба“.Заменик-началникот на полицијата Диксит Гедам потврди дека натрапникот се соочил со Кан откако влегол во куќата. Засега не е познат идентитетот на напаѓачот.
Кој е Саиф Али Кан?
Саиф Али Кан е еден од најпознатите индиски актери, познат по неговата работа во Боливуд, индиската филмска индустрија.
Роден е на 16 август 1970 година во Њу Делхи, како син на познатата актерка Шармила Тагоре и индискиот принц и играч на крикет Мансур Али Кан Патауди.
Саиф потекнува од добро познато аристократско семејство и често го нарекуваат „Чоте Наваб“ (малиот принц) поради неговото кралско наследство.
Тој ја започна својата кариера во Боливуд во 1990-тите и стана популарен по глумата во романтични комедии, акциони филмови и драми.
фото:Instagram printscreen/ saifalikhanpataudiworld
