Клавијатуристот на „Меморија“, Давор Јордановски во соработка со реномираната етно-група „Синтезис“ ја претстави својата најнова музичка креација – песната „Да сум таа“. Ова дело претставува симбиоза на длабоки емоции, македонски корени и современа музичка естетика. Автор на музиката е самиот Јордановски, кој заедно со истакнатите музичари Радослав Шутевски, Ванчо Јовчев, Гоце Димовски, Марјан Јовановски, Гоце Узуновски и Горан Гешовски стои и зад аранжманот. Со години препознатлив по својата автентична музичка визија, Јордановски овојпат оди чекор понатаму, спојувајќи ја својата композиторска зрелост со уникатниот звук на „Синтезис“ во едно мошне автентично етно – поп музичко парче.
Текстот е на познатиот фолк текстописец – Борче Нечовски, чиј поетски јазик ѝ дава дополнителна нота на препознатливост на песната.
Песната добива своја посебна боја преку вокалните изведби на Сузана Јовчева, Анета Шуланковска и Билијана Ристовска, чии гласови внесуваат женственост, сила и емоција, правејќи ја „Да сум таа“ не само музички, туку и душевен доживеј.
Со оваа песна, Јордановски и „Синтезис“ уште еднаш поврдуваат дека македонската музика има свој автентичен идентитет и уникатна препознатливост кој допира далеку, надвор од границите на Македонија.
Фото: Јутјуб принтскрин/ Фејсбук/Davor Jordanovski
Извор: 24музика
