Деновите во периодот од 26 до 28 август се денови резервирани за овогодинешното издание на Каменичко културно лето 2024. Настанот традиционално се одржува на Градскиот плоштад, а домаќините КИЦ Романса и Општината Македонска Каменица и овој пат најавуваат разновидна музичка програма и музички имиња кои ќе ги задоволат инајпребирливите музички сладокусци.
Во рамки на првата фестивалска вечер на 26 август (понеделник), а во чест на најголемиот каменички празник Успение на Пресвета Богородица – Ден на рударите, Каменичко културно лето 2024 година ќе започне со програма која ќе ја одбележат настапите на повеќе културно-уметнички друштва од земјава и странство, и тоа КУД „Вера Јоциќ“ од Македонска Каменица и културно-уметнички друштва од Србија и Бугарија.
Веќе следниот ден на 27 август (вторник) публиката ќе ги види и чуе неверојатниот Наум Петрески, миленикот на младата генерација Огнен Здравковски и дамата која никого не остава рамнодушен и чија изведба на една од најубавите македонски песни „Заветна“ освои многу срца – Бојана Скендеровски.
Дел од втората вечер закажана на големиот православен празник Успение на Пресвета Богородица на 28 август (среда), пак, ќе бидат рок легендите Ареа, рнб двоецот ДНК и гостинката од Србија – Слаѓа Алегро.
„Дојдете заеднички да го отвориме овогодинешното културно лето и заеднички да уживаме во прекрасните настапи на музички гости кои ветуваат одлична атмосфера и многу хитови“, се вели во поканата на домаќините.
