Вечерва, вторник , 26-ти ноември 2024 во Домот на АРМ со почеток во 20 часот ќе започне 25-то јубилејно издание на музичкиот фолк фестивал „Фолк фест Роса 2024“. И покрај тоа што наградите ги нема и фестивалот е ревијален, сепак, дружењето помеѓу колегите музичари на вакви настани е секогаш добредојдено. А тука сме и ние новинарите за да погледнеме што има ново на сцената, но и позади сцената, кој за кого зборува и што е она ново што може да се дознае и чуе од сите нив.
Оваа година на фестивалската сцена премиерни песни ќе отпеат познатите македонски музички имиња меѓукои ќе ги споменеме: Нино Величковски, Благоја Груевски, Мишко Крстевски, Дамјан Стојановски, Стојне Николова, Ленче и Горан Кукиќ, Анета Љумаковска… и уште многу, многу други.
Како што не информира организаторот, единствените три награди кои ќе бидат доделени се оние за животно дело, а нив рамноправно ќе ги добиваат: Огнен Неделковски, Смиља Митревска и Мирче Кикиритков. Водителка, како и последниве години досега и овој пат ќе биде Ирена Спировска.
„Роса фолк фест“ ќе биде снимен и дополнително емитуван на националната Алфа телевизија.
