Францускиот актер Оливие Мартинез покрена нова правна постапка против поранешната сопруга, холивудската ѕвезда Хали Бери, барајќи зголемување на алиментацијата за нивниот 13-годишен син Мејсео. Како што наведува во судските документи, околностите во меѓувреме се промениле, бидејќи актерката, според неговите тврдења, поминува значително помалку време со детето отколку претходно.
Според договорот што поранешните сопружници го постигнале при разводот во август 2023 година, Хали Бери секој месец издвојува 8.000 долари за издржување на синот. Покрај тоа, таа е обврзана да му исплаќа на Мартинез и дополнителни 4,3 отсто од годишните приходи што надминуваат два милиони долари.
Овој финансиски договор првично бил направен со претпоставка дека родителите подеднакво ќе го делат старателството, односно дека секој од нив ќе поминува по половина од времето со детето. Сепак, Мартинез сега тврди дека таквата поделба повеќе не постои. Според неговите наводи, Хали поминува само 18 отсто од времето со синот, додека тој ја презема дури 82 отсто од секојдневната грижа за момчето.
Поради тоа, тој смета дека постојниот износ на алиментацијата повеќе не одговара на реалните околности и бара од судот повторно да ги разгледа финансиските обврски на неговата поранешна сопруга.
Во документацијата навел дека сè уште не одредил колкава сума точно бара, бидејќи чека да добие увид во актуелните финансиски извештаи на актерката. Исто така, тврди дека Бери не доставила нова изјава за своите приходи, а како примери за нејзините профитабилни ангажмани ги посочува филмот „Crime 101“, како и проектите „Fleur“ и „Red Card“.
Од друга страна, Мартинез ја претставил и сопствената финансиска состојба, наведувајќи дека неговите примања се значително помали. Според податоците што ги изнел, од актерските хонорари и авторските надоместоци месечно заработува во просек околу 776 долари, додека неговите животни трошоци надминуваат 17.500 долари месечно. Покрај зголемувањето на алиментацијата, од поранешната сопруга бара и да му надомести 240.000 долари што ги издвоил за адвокатски услуги за време на судскиот спор.
Новите финансиски барања доаѓаат во период кога поранешните сопружници се соочуваат со сериозни несогласувања околу старателството над синот. Нивниот конфликт дополнително ескалирал на почетокот на октомври, кога Мартинез побарал забрана за приближување за Хали Бери, обвинувајќи ја дека физички го нападнала нивниот син за време на наводен инцидент што се случил на 26 септември.
Актерката категорично ги отфрлила сите обвинувања и во судските документи навела дека никогаш не го повредила детето.
„Никогаш не сум го малтретирала Мејсео, ниту физички, ниту емоционално, ниту на кој било друг начин“, изјавила Бери во судските документи.
На крајот на октомври, судот ја укинал привремената забрана за приближување што била побарана против актерката, со образложение дека Мартинез не доставил доволно докази за нејзино продолжување.
Сепак, останала на сила привремената одлука според која францускиот актер го задржува примарното физичко старателство над синот, додека Хали Бери може да го гледа за време на посетите што не вклучуваат ноќевање.
Следното рочиште е закажано за 17 декември, кога судот повторно треба да ги разгледа прашањето за старателството и околностите во кои момчето го поминува времето со родителите.
foto: printscreen/instgaram/halleberry
