Сомнилогија претставува несвесно зборување додека спиеме. Епизодите на сомнилогијата се однесуваат на мрморење, кажување неповрзани зборови и целосни монолози.
Некои луѓе во текот на сонот дури и разговараат со луѓето околу нив што се будни. Зборувањето во сон може да се случи во која било фаза од сонот, но најизразено е за време на РЕМ-фазата, кога сонуваме. Сомнилогијата е краткорочна и не е производ на рационалното.
Што го предизвикува зборувањето во сон?
Националната фондација за спиење наведува дека сомнилогијата може да биде предизвикана од повеќе причини. Покрај стресот, депресијата и недостигот на сон, зборувањето додека спиете може да биде предизвикано и од консумирање алкохол, од мамурлак и други фактори.
Исто така, сомнилогијата може да биде поврзана и со некои болести, особено со нарушувања во спиењето и кошмари. Во ретки случаи кај возрасни, зборувањето во сон е поврзано со ментална болест или ноќни напади.
Иако зборувањето во сон не е опасно за здравјето, може да претставува проблем за лицето што спие со вас. Затоа, доколку зборувате во сон, обидете се да спиете доволно, држете се до распоредот за спиење и избегнувајте алкохол и тешка храна пред спиење.
извор:курир.мк
фото:Freepik
